[ENTRE-PAS DE TREMPO] - MOUNTA À LA GÀRDI ...

​

Es mounta de-vers un ròdou soubeiran que fuguè uno vigìo, un santuàri, un fouart, avans que venguèsse lou simbèu de Marsiho emé sus sa cimo l'estampaduro de la baselico bastido au siècle XIX en l'ounour de la "Bouono Maire". À l'epoco, la mountado si fasié d'à pèd vo 'mé lou mounto-davalo que toumbèron en 1967. Vuei, lei vesitaire li vènon 'mé la vouaturo, lou bus, vo lou càrri de tourisme. Que que siegue lou biais pèr li mounta, li van de-longo dins lei piado dei roumiéu que trèvon lou site despuei vue siècle.

Leis ex-voto

Un ex-voto (en prouvençau "en seguido d'un vot") es uno lauso, un óujèt vo un pichot tablèu remés à-n-un santuàri pèr quaucun, qu'après agué demanda prouteicien, ajudo vo garisoun alor que si capitavo d'èstre en malo-abèu, counsidèro que soun vot es esta enauvi bouonodi l'intercessien de la Vièrgi pròchi de Diéu. L'ex-voto remarcié dounc pèr aquesto gràci reçudo e n'en pouerto lou testimòni publicamen. Pòu èstre uno placo de maubre em'un tèste de gratitudo. Vo bèn la maqueto dóu batèu vo de l'avioun que lou dounadou li perihavo. Vo enca d'un quaucarèn que l'es foueço estaca (sei decouracien militàri) vo d'uno obro de longo que faguè. La baselico recato mant-un ex-voto pinta.

En generau, vous pauvon au toco-toco lei rapresentacien de l'espàci terrèstre (l'evenimen que faguè naisse lou vot, qu'es uno evoucacien dei precioue raport à la vido de-davans) e l'espàci celestiau (la Vièrgi à l'enfant dins lei niéu).