Rudy Ricciotti nasquè à Kouba en Argierié lou 22 d'avoust de 1952 e passè uno partido de sa jouinesso à Port-Sant-Loueidóu-Rose, en Camargo. Soun paire, un oubrié italian que venguè mèstre d’obro dins lou bastimen après agué segui lei cous dóu souar, l'amoudè sus sei chantié noumbrous. Aquel esperimen d'aquito sus lou terren marquè pèr tout e jamai lou joueine Rudy que, quàuqueis annado pus tard, faguè d'estùdi d'architeituro à Marsiho à l'Escolo Naciounalo Superiouro d’Architeituro (1980), un còup davera soun titre d'enginaire de l'Escolo d’enginaire de Genèvo (1975).

 

Aro tène soun sèti à Bandòu e s'afourtisse coumo lou militant dóu coumbat de vuei sus lei terro que li signourejo lou regiounalisme novo-prouvençau. Sei mànteis obro que comton en Franço, coumo lou Cèntre couregrafi naciounau de-z-Ais-de-Prouvènço (2006), lou nouvèl Estàdi Jean Bouin à Paris (2013) vo lou Musèu dei civilisacien de l'Europo e de la Mediterragno (MuCEM) à Marsiho (2013), l'auran baia un calibre internaciounau. Pèr bello provo e pèr eisèmple la passarello pèr la Pas à Seoul (Courèio dóu Sud), lou Nikolaisaal de Potsdam (Alemagno), lou Palais dei festenau à Veniso (Itàli), lou Musèu d'Art de Vuei de Liège (Béugico) vo enca lou Filarmounié de Gstaad (Souïsso). En 2006, lou Grand prèmi naciounau de l'Architeituro faguè intra Rudy Ricciotti dins lou ciéucle deis architèite francés d'elèi. Counsacrè tambèn aquelo generacien de proufessiounau que saup mescla la creacien pouderoue e uno culturo bastisserello vertadiero. Medaio d’Or de la Foundacien de l’Acadèmi d’Architeituro, fuguè eliegi sòci de l'Acadèmi dei teinoulougié lou 10 de desèmbre 2014.

​

En mai d'acò, fuguè presidènt deis edicien Al Dante de 2007 à 2013 e faguè publica un mouloun de libre (pouësìo, proso pouetico emai esperimentalo, assai teouri, catalogue e publicacien d’artisto, antoulougié, revisto), CD (pouësìo sounoro, musico), DVD, journau, e prenguè sa part e/vo ourganisè màntei manifestacien (leituro publico, perfourmanço, coulòqui, espousicien...). Soun óubràgi Le béton en garde en vue (Lemieux Editour, 2015) es pèr eisèmple uno perlo coumo l'a gaire.

 

Quàuquei proujèt que courron :

2014-2018 - Bourdèus Metroupòli Arena, Bourdèus Metroupòli

2014-2018 - Tour Mirabeau 1, CMA CGM, Marsiho

2017-2019 - Agrandimen de la garo de Nanto

​

"Pèire Puget ... Logos petra. Nasquè Francés pèr maladicien. Escultour d'influènci italiano, fuguè mal-eima pèr sei counciéutadan ... Neissu Francés, fuguè mespresa pèr sei coulègo Italian ... Fuguè puni d'èstre Marsihés pèr lou rèi que si creiguè troumpa pèr " un proujèt bèn tròup bèu pèr Marsiho "... Galavardas pèr coumbatre e groumandèu pèr dire grègo, faguè tremoula lou maubre emai dansa la pèiro, de-longo pourta au gros d'un biais rigourous achini. En Puget aeternam gratiam."

Rudy RICCIOTTI

En vain ! in Collection L'art en écrit, Rudy Ricciotti et Editions Jannink, Paris, 2014